अखेर, लिंबूचे दर कमी झाले; गोणीमागे ४०० ते ५०० रुपयांनी घट

कृषी सेवक | १८ मे २०२४ | उन्हाळ्यात तेजीत असलेल्या लिंबांची आवक वाढल्याने दरात घट झाली आहे. अवकाळी पावसामुळे लिंबांचे नुकसान होण्याची शक्यता असल्याने सोलापूर, नगर जिल्ह्यातील शेतकऱ्यांनी मोठ्या प्रमाणावर लिंबे बाजारात विक्रीस आणली आहेत. त्यामुळे लिंबांच्या गोणीमागे ४०० ते ५०० रुपयांनी दर कमी झाले आहेत. राज्याच्या विविध भागांत अवकाळी पाऊस सुरू आहे. पावसामुळे लिंबांचे नुकसान होत असल्याने शेतकऱ्यांनी लिंबांची मोठ्या प्रमाणावर तोड सुरू केली आहे.

Goat Farming | ‘या’ तीन जातींच्या शेळ्यांपासून बनाल लखपती; जाणून घ्या वैशिष्ट्ये

बाजारात आवक वाढली

अवकाळी पाऊस आणि हवामान बदलामुळे लिंबांच्या मागणीत घट झाली आहे. आठवड्यापूर्वी तेजीत असलेल्या लिंबांच्या दरात आता घट झाली आहे. घाऊक बाजारात सध्या प्रतवारीनुसार लिंबांच्या एका गोणीला ३०० ते १३०० रुपये दर मिळत आहेत, अशी माहिती एका व्यापाऱ्याने दिली आहे. मार्केट यार्ड घाऊक बाजारात सध्या दररोज दीड ते दोन हजार गोणी लिंबांची आवक होत आहे. आठवड्यापूर्वी किरकोळ बाजारात एका लिंबाची विक्री पाच ते दहा रुपयांना होत होती. आवक वाढल्याने लिंबांच्या दरात घाऊक आणि किरकोळ बाजारात घट झाली आहे.

हैदराबाद, चेन्नईहून लिंबांची आवक

सध्या बाजारात विक्रीस पाठविण्यात येणारी लिंबे आकाराने लहान आणि हिरवी आहेत. लिंबांची प्रतवारी फारशी चांगली नसल्याने दरही कमी मिळाले आहेत. उन्हाळ्यात आंबट लिंबांना चांगले दर मिळतात. राज्यातील प्रमुख बाजारांत सोलापूर आणि नगर जिल्ह्यातील शेतकरी लिंबे विक्रीस पाठवितात. त्याचबरोबर हैदराबाद, चेन्नई परिसरातील शेतकऱ्यांनीही महाराष्ट्रातील बाजारात लिंबे मोठ्या प्रमाणावर विक्रीस पाठविली आहेत.

ऊस पिकात झपाट्याने वाढतोय ‘ब्लॅक बगचा’ प्रादुर्भाव; करा “हे” एकात्मिक नियंत्रण उपाय!

अवकाळी पावसामुळे लिंबांचे नुकसान होण्याची शक्यता असल्याने सोलापूर आणि नगर जिल्ह्यातील शेतकऱ्यांनी लिंबे विक्रीस पाठविली आहेत. हवामान बदलामुळे लिंबांच्या मागणीत घट झाली आहे. बाजारात आलेली लिंबे कच्ची आणि रंगाने हिरवी आहेत. कच्च्या लिंबांच्या मागणीत घट झाली आहे. १५ किलो लिंबांचे दर प्रतवारीनुसार ३०० ते १३०० रुपयांपर्यंत आहेत. लिंबांच्या गोणीच्या दरात ४०० ते ५०० रुपयांनी घट झाली आहे, असे एका लिंबू व्यापाऱ्याने सांगितले आहे.